UWalaza nerekhodi likazwelonke lika-100m kwiGauteng North Championships

SIBUSISO MDLALOSE

ISIBABULI somgijimi esidlondlobalalayo, uBayanda Walaza, siphinde senza ezibukwayo siqopha irekhodi likazwelonke laseNingizimu Afrika lokuba ngumgijimi ongaphansi kweminyaka engu-20 oshaye isikhathi esingaphansi kwemizuzwana eyishumi sidla umhlanganiso kwiGauteng North Championships, ePilditch Stadium, ePitoli ngoMgqibelo.

UWalaza (19) ushaye isikhathi esingu-9.99 sec enqoba isicoco seGauteng North Championships. UGift Leotlela ulale isibili ngo-10.17 sec, kwalandela u-Emile Erasmus olale isithathu ngo-10.26 sec.

Lokhu kumenze waba ngumgijimi wokuqala waseNingizimu Afrika ongaphansi kweminyaka engu-20 ubudala ukwenza lesi sikhathi. Ungowesikhombisa emhlabeni jikelele owenze leli rekhodi. 

UWalaza odabuka eSobokeng, eGoli, usevele uzibekisele indawo kwi-World Athletics Championships ezoba seJapan, ngoSepthemba. Uzogijima kowamanqamu e-Athletics South Africa (ASA) Grand Prix ngoLwesithathu, e-University of Johannesburg kulo ibanga lika-100m. 

Kubhekwe ngabomvu ukuthi iyozala nkomoni phakathi kwakhe noKarabo Letebele okunguyena odle umhlanganiso ku-100m ngeledlule kowomlenze wokuqala weGrand Prix, ePitoli. 

Lo mgijimi ongaphansi kwe-Athletics Gauteng North, uqale ukubonakala ngo-2023 edla umhlanganiso kwi-SA U-18 200m, waphinde waphuma endaweni yesithathu kwi-Athletics South Africa U-18 eMgungundlovu ngoJanuwari ka-2023.

Lokhu kulandelwe wukudla umhlanganiso kwi-SA U-20 Championships kulo ibanga lika-100m ngoMashi nyakenye. 

Kanti kukuma-Olympic Games abebanjelwe eParis, eFrance, lapho khona leli bhungu lizakhele igama emhlabeni likhombisa libuya nendodo yesiliva ligijima eqenjini lakuleli le-relay ebangeni lika-4x100m. Nalapho uWalaza uqophe umlando wokuba ngumgijimi wokuqala wakuleli oneminyaka engu-18 obuye nendondo kuma-Olympic. 

Kungakapholi maseko ebuye kuma-Olympic, uWalaza uphinde wenza ezibukwayo ebuya namagolide ku-100m naku-200m kwi-World Athletics U-20 Championships, eLima, ePeru, ngawo u-Agasti.