NGEMUVA kokufaka amasondo inqwaba yabadlali, AmaZulu FC aseqalile ukugawula izinduku ezintsha azogadla ngazo ngesizini ezayo ka-2025/26, kulandela ukusayinisa isiphekepheke somdlali wasesiswini, uThapelo Matlhoko, osuka kwiKruger United edlala kwiMotsepe Foundation Championship.
UMatlhoko (22) ubengomunye wabadlali abagqamile ngesizini edlule kwiKruger yaseBushbuckridge, eMpumalanga, eqede isizini edlule ka-2024/25, isendaweni yesihlanu kwi-log yeChampionship. Kuvele ukuthi useqede konke naMaZulu okulindeleke aqale ukuziqeqesha nawo maduze ukulingiselela isizini ezayo.
“AmaZulu aseqede konke noMatlhoko, usayiniswe inkontileka yeminyaka emibili enombandela wokuyelula ngeminye emibili. Ungomunye wabadlali okungangabazeki ukuthi bazofika kuzwakale kuleli qembu laseThekwini ngenxa yekhono lakhe,” kusho umthombo.
Kuvela eyokusayina kukaMatlhoko kuMaZulu nje, ngo-Ephreli Isolezwe like labika ngalo mdlali obekuthiwa uphakathi kwabadlali beKruger abafunwa uthuli ngamaqembu eBetway Premiership.
Muva nje, kuke kwavela negama leKaizer Chiefs phakathi kwamaqembu abemcathamela. AmaZulu asanda kuvulela izembe kubadlali abangu-18, okubalwa kubona unozinti uVeli Mothwa, Ramahlwe Mphahlele, Thembela Sikhakhane, Abbubaker Mobara, Rowan Human, ukubala abambalwa.
Akhulule uTshepang Moremi ukuthi ajoyine i-Orlando Pirates, kwathi u-Etiosa Ighodaro noSifiso Ngubeni abebebolekwe kwiMamelodi Sundowns, babuyela kuyona yize u-Ighodaro esekhonjwa kwiChiefs.
KuMaZulu, uMatlhoko ujoyina unozinti, uDarren Johnson osuka kwiChippa United noLiam Bern oyisitobha esisuka kwiCape Town Spurs okuvela ukuthi sebesayiniswe Usuthu.
Leli qembu eliqede isizini edlule ka-2024/25 endaweni yesithupha kwi-log yePremiership, kulindeleke limemezele abanye abadlali elibasayinisile abazovala izikhala zabakhululiwe.
Kuthintwa uPhilani “Pro” Ndlela waMaZulu, ukuqinisekisa ukusayiniswa kukaMatlhoko yileli qembu, uthe awekho amagama abadlali asebesayinisiwe asafike kwelakhe ihhovisi okwamanje.
“Ngingabe ngidlala ngawe uma ngingaphika noma ngivume ngabadlali abasha. Awekho amagama asafike kwelami ihhovisi asuke kwi-Director of Football (Pedro Dias) yeqembu. Ngiyethemba uyakuqonda lokho,” kuphawula uNdlela.