URiveiro uyaziqhenya ngeBucs phezu kokwehluleka kwiChampions League
URELEBOHILE Mofokeng ongomunye wabadlali abasebancane be-Orlando Pirates abashaye into ecokeme kwiCaf Champions League nokwenza umqeqeshi waleli qembu akholwe wukuthi liqhakazile ikusasa laleli qembu ngenxa yokubophela abanjengalaba
Image: BACKPAPGEPIX
UBONA isazobulala izizwe i-Orlando Pirates egqishe ngesikwati esinabadlali abasebancane, umqeqeshi waleli qembu oseshiya, uJose Riveiro, kulandela ukuphuma kwaleli qembu emqhudelwaneni weCaf Champions League.
IPirates kwale kancane yayodlala owamanqamu eChampions League nabakhaya bayo iMamelodi Sundowns, iguqiswa yiPyramids yase-Egypt ngo 3-2 emdlalweni wesibili wowandulela owamanqamu eJune 30 Stadium, eCairo, e-Egypt, ngoLwesihlanu.
Kowomlenze wokuqala zazibambane ngo 0-0 e-Orlando Stadium, eSoweto, nobesekuphoqa eZimnyama ukuba zinqobe kumnyama kubomvu kowomlenze wesibili ukwedlulela kowamanqamu
ISundowns izibekisele indawo kowamanqamu eChampions League ngokuguqisela ekhaya i-Al Ahly ngo 1-0 kowomlenze wesibili ngalo uLwesihlanu, eCairo International Stadium.
Owamanqamu eChampions League usuyodlalwa yiSundowns nePyramids. Owomlenze wokuqala ungoMeyi 24, owesibili ungoJuni 1.
URiveiro oshiyayo kulezi zingqungqulu zaseSoweto ekupheleni kwale sizini, ubezoba yiqhawe elikhulu ngokuvalelisa kuleli qembu ngokulinqobela indebe yeChampions League elaligcine ukuyiphakamisa ngo-1995.
Kanti ngaphandle kwalokho lo mqeqeshi odabuka eSpain kula masizini amathathu eqeqesha eZimnyama, unike ithuba abadlali abasebancane abasuka eqenjini lenjejane yaleli qembu, okubalwa kubona uRelebohile Mofokeng, Mohau Nkota noMbekezeli Mbokazi, ukubala abambalwa.
Bobathathu laba badlali abakhushulelwe esikimini esikhulu ngokwehlukana bafike kwezwakala, ikakhulukazi uMofokeng noNkota abakhombise ukuvuthwa emidlalweni yeChampions League.
“Sebevele bangabadlali abamqoka eqenjini njengoba beneminyaka engu-19 no-20, kodwa kusekuningi okusafanele bathuthuke kukho njengabadlali,” kusho uRiveiro ekhuluma nabezindaba.
“Kuyinto enhle kakhulu futhi naseqenjini ukuba nabadlali abasebancane abenza kahle, ngoba lokho kusho ukuthi ikusasa liqhakazile kwi-Orlando Pirates ngoba inesikwati esinabadlali abasebancane abasalambele impumelelo.
Siphatheke kabi ngokwehlulwa kwethu (kwiChampions League) kodwa ikusasa leqembu libukeka liqhakazile.”
Yize seziphumile kwiChampions League kodwa eZimnyama esezine-MTN 8 emgodleni kule sizini, zisenethuba lokunqoba ezinye izicoco ezimbili ezisasele kule sizini esisongwa, okuyiNedbank Cup neBetway Premiership.
Zizodlala nezimbangi zazo ezinkulu iKaizer Chiefs kowamanqamu eNedbank ngoMeyi 10, eMoses Mabhida Stadium, eThekwini.
Ngaphambi kowamanqamu eNedbank lezi zinkunzi zaseSoweto zisazodudulana kowePremiership ngoMgqibelo ngo-3 ntambama, eFNB Stadium, eNasrec.
Zisesembangweni wesicoco seligi yeBetway Premiership neSundowns esaqhwakele kwi-log ngamaphuzu angu-55, ekubeni zona zisendaweni yesibili ngangu-46 futhi zisenemidlalo emibili ezingakayidlali.
“Ngiyaziqhenya ngeqembu lonke, hhayi kulo mqhudelwano weChampions League kuphela, kodwa kulo lonke uhambo olude esesiluhambile kule sizini. “