UNcikazi uzokwamukela noma yini ngesokuqeqesha kwiBucs
UMQEQESHI we-Orlando Pirates osabambile, uMandla Ncikazi, okulindeleke kucace maduze ngekusasa lakhe ekuqeqesheni leli qembu
Image: BACKPAGEPIX
UZOKWAMUKELA akunikwa yiqembu umqeqeshi we-Orlando Pirates, uMandla Ncikazi, okulindekele ukuthi livele igama lakhe njengoba leli qembu lithungatha ozovala isikhala sikaJose Riveiro oshiye emasontweni adlule.
UNcikazi obekhuluma nabezindaba ngemuva komdlalo weBetway Premiership wezakhe naMaZulu FC ophele zibambene ngo 1-1 eMoses Mabhida Stadium, eThekwini, ngoMgqibelo, uveze ukuthi ulindele noma yisiphi isinqumo esizothathwa ngabaphathi beZimnyama ngekusasa lakhe.
Leli qembu laseSoweto maduze kulindeleke lidalule umqeqeshi omusha ozothatha isikhundla sokuba yinhloko yabaqeqeshi ngokugcwele ngesizini ezayo ozovala isikhala sikaRiveiro okhonjwa kwelinye lamaqembu ase-Egypt.
Lo mqeqeshi waseSpain obesekuvele kumenyezelwe ukushiya kwakhe kweZimnyama azinqobele izicoco ezintathu, ucele ukushesha akhululwe ingakasongwa le sizini ukuze ayoqala umsebenzi wakhe eqenjini elisha elingakadalulwa.
UNcikazi osesebenze njengephini likaRiveiro amasizini amathathu, kungenzeka anikwe ngokugcwele isikhundla sokuhola iPirates. Kusangenzeka futhi abuyele kwesokuba yiphini lomqeqeshi omusha.
“Mina ngidaleke ngendlela ehlukile. Ngisebenza kwiPirates, uma ngikhona kuhle lokho futhi iyiqembu elihle. Noma ngingekho, izoqhubeka ibe yiqembu elihle. Ngijabule ngeqhaza engisalibambile eqenjini futhi umsebenzi usathakaselwa yiqembu.
Inqobo nje uma kusenjalo, ngiyohlala ngiyisisebenzi seqembu kuze kube yilapho ngitshelwa okunye,” kushaya ngamafuphi uNcikazi.
Emidlalweni emithathu ebambile uNcikazi, iBucs ibuye namaphuzu amahlanu ngokudlala ngokulingana ne-TS Galaxy naMaZulu, yanqoba iSupersport United.
Izosonga isizini ngokudlala neMagesi FC ngoLwesithathu ngo-7.30 ebusuku, e-Orlando Stadium, eSoweto.
IBucs akusekho okungako ekudlalelayo njengoba isivele izibekisele indawo kwiCaf Champions League ngokuqeda endaweni yesibili kwi-log yePremiership ngemuva kweMamelodi Sundowns engompetha beligi.
Kodwa ukufinyelela kwayo emaphuzwini angu-60 kuyingqophamlando kuleli qembu kwazise laligcine ngesizini ka-2010/11 ukwenza lokhu linqoba iligi yePremiership. Uma linqoba ngoLwesithathu kwiMagesi lingaqeda linamaphuzu angu-63.