OweMidlands nethemba lokubuya kwesasasa lebhola eMgungundlovu
UMQEQESHI weMidlands Wanderers, uVincent Myeni, okhuphulele leli qembu esigabeni seMotsepe Foundation Championship lilala isithathu kumaPlay-Offs kazwelonke eSafa ABC Motsepe League ngeledlule, ePitoli
Image: BACKPAGEPIX
USIHLALO ongumqeqeshi weMidlands Wanderers, uVincent "Masenti" Myeni, ukholwa wukuthi kuzolibuyisa ithemba nesasasa kubathandi bebhola baseMgungundlovu nakosomabhizinisi abancane bakule ndawo ukwenyukela kwabo kwiMotsepe Foundation Championship.
UMyeni ubexoxa neSolezwe ngemuva kokuba ezakhe zikhushulelwe kwiChampionship ngokulala isithathu kumaPlay-Offs kazwelonke eSafa ABC Motsepe League abesePitoli, eGauteng.
Kule midlalo yokuhlunga eqale ngeledlule ngoJulayi 1 yasongwa ngeSonto, mathathu amaqembu akhushulelwe kwiChampionship, okuyiGomora United yaseGauteng, i-The Bees FC yaseMpumalanga, neWanderers yaKwaZulu-Natal
IGomora idle umhlanganiso kule midlalo ngokuguqisa i-The Bees ngo 2-0 kowamanqamu, kwathi iWanderers yashaya iThames FC yaseNorth West kowokulwela indawo yesithathu.
"Kusho lukhulu kithina njengeqembu iMidlands ukuphumelela ukukhushulelwa kwiMotsepe Championship ikakhulukazi njengoba bekungokokuqala sidlala kumaPlay-Offs kazwelonke e-ABC Motsepe. Okungijabulisa kakhulu wukuthi kuzoshintsha impilo yabadlali abaningi kuleli qembu ukukhushulelwa kweqembu esigabeni esikhokhelayo. Kuzokwenza bakwazi ukubeka isinkwa etafuleni ngenxa yokuthi abanye babo ngiyasiqonda isimo samakhaya ababuya kuwona," kusho uMyeni.
"Ngikholwa wukuthi kuzobuya nesasasa kubathandi bebhola baseMgungundlovu namaphethelo njengoba inkundla iHarry Gwala Stadium ibingasenaqembu lePSL elidlalela kuyo. Kuzophinde kuhlomule nosomabhizinisi abancane abaziphilisa ngokudayisa ukudla, abanye babo abebelokhu besincenga ukuthi asikhuphule leli qembu silifake kuFirst Division, engikholwa wukuthi ukuphumelela kwethu kusho ukufezeka kwesifiso sabo kuletha nentokozo yokuxosha ikati eziko kubona.”
UMyeni nephini lakhe uThulisani “Gattuso” Latha, baqede ishobolo lamasizini ayisikhombisa lamaqembu aKwaZulu-Natal lokuphuma inqina kamabuyaze kweyokuhlunga yeMotsepe League njengoba kwakugcine ngesizini ka-2016/17 ngoThongathi FC ukuphumelela kweqembu lesifundazwe kule midlalo.
Mayelana nokuqinisa iqembu, uMyeni uthi basazohlala bahlahle indlela ebheke phambili.
"Kunabadlali abasishiyayo eqenjini abazokwethulwa maduze kwamanye amaqembu ePremiership, okuyinto esiyithakaselayo ukubabona bethola amadlelo aluhlaza. Ngakho lokho kuzovulela abanye ithuba nokusho ukuthi sisezinhlelweni zokuthola abanye abadlali abambalwa abazovala izikhala zabo. Engingakuqinisekisa nje ukuthi ngeke senze zinguquko eziningi eqenjini, sizobagcina abadlali abaningi esisuka nabo kwiMotsepe League, futhi ngeke siyishintshe indlela yethu yokudlala esiyithatha njengosikompilo lweqembu lethu,"kusho uMyeni.