OweGoodfellas akanazinhloso zezinguquko eziningi kwiMotsepe
IQEMBU laseMzimkhulu, iGoodfellas FC, elingelinye lamaqembu amane akhushulelwe esigabeni seSafa KZN ABC Motsepe League ngemuva kokuphumelela kuma-Play Offs eHollywoodbets Men's Regional League abedlalelwa ePort Shepstone ngempelasonto
Image: GOODFELLAS FC SITHUNYELWE
ONGUSIHLALO weGoodfellas FC ephumelele kuma-Play Offs esifundazwe eHollywoodbets Men’s Regional League akayingeni eyokwenza izinguquko eziningi kuleli qembu elizoyibamba kwiSafa KwaZulu-Natal ABC Motsepe League ngesizini ezayo ka-2025/2026.
UNhlakanipho Mhlawuli ohola leli qembu laseNew City, eMzimkhulu, ngaphansi kwesifunda iHarry Gwala usho kanjena nje ezakhe ziphakathi kwamaqembu amane enze kahle kuma-Play Offs ngempelasonto edlule, ePort Shepstone, azibekisela indawo esigabeni se-ABC Motsepe League ngesizini ezayo.
Lawo maqembu yiNewcastle Warriors (Amajuba), Wartburg (Umgungundlovu) neTornado (King Cetshwayo).
“Kusho lukhulu kithina njengeqembu ukugcina siphumelele ukukhushulelwa esigabeni seMotsepe League njengoba nangesizini edlule sifinyelele kule midlalo kodwa asangaphumelela.
"Kodwa sakwazi ukubuyela emuva siyolungisa amaphutha, saphinde sabuya, sagcina sikwazile ukuphumelela.
"Ngenkathi siya kuma-Play Offs angesizini edlule, iqembu beliqeqeshwa uDan Motsa kodwa ngenxa yomsebenzi wakhe wobuthisha obumenza axineke, kule sizini edlule sibe sesiqoka uZothani “Tazz” Hlutshwa ekuqeqesheni iqembu,” kusho uMhlawuli.
“UHlutshwa uyibambe kahle isizini yonke, kwathi ngemidlalo yokugcina sesibona ukuthi sesithubeni lokuya kuma-Play Offs esifundazwe, sabe sesilanda uLindokuhle Bhengu ukuzosizana naye. Saphinda sacela noLangeni “Chansa” Gogo, oqeqesha onozinti kwiNjampela FC (edlala kwiMotsepe League) ukuzoseleseka njengoba engowakhona lapha eMzimkhulu.
Ayancomeka kakhulu amagalelo alaba baqeqeshi kanye nokuzinikela kwabadlali bethu ekukhushulelweni kweqembu kwiMotsepe League. Ngakho kubalulekile ukuthi siligcine leli thimba labaqeqeshi, ngaphandle kukaGogo osengumqeqeshi weNjampela obezele ukuzosisiza nje kuma-Play Offs kuphela.”
Isifunda iHarry Gwala okuzalwa kuso umqeqeshi weLamontville Golden Arrows, uManqoba Mngqithi, besesihlale amasizini amathathu singenalo iqembu kwi-ABC Motsepe League kulandela ukudayiswa kwe-G Millionare.
“Noma sazi ukuthi isigaba seMotsepe League esiyodlala kuso ngesizini ezayo siqinile kuneseHollywoodbets esisuka kuso, kodwa asizukwenza izinguquko eziningi kuleli qembu esinalo. Sizoqinisa isikwati kwezinye izindawo ngabadlali abambalwa abanamava okudlala kwiMotsepe League, ukuze sikwazi ukumelana nokudlala kulesi sigaba ngesizini ezayo,” kuqhuba uMhlawuli, oveze ukuthi usephezu kwezinhlelo zokunxenxa abaxhasi ukumelana nezindlelo zokudlala kwiMotsepe League ngesizini ezayo.