OweCasric uthemba inkundla yasekhaya ezogqilaza kowama-Play Offs

UMQEQESHI weCasric Stars, uBucks Mthombeni, ufuna bakusebenzise ngendlela ezovuna bona ukudlalela kwabo ekhaya enkundleni akholwa wukuthi izothwalisa kanzima izitha emdlalweni wakusasa neCape Town City kowamaPSL Promotion Play-Offs. 

ICasric izodudulana neCity emdlalweni womlenze wokuqala eSolomon Mahlangu Stadium, KwaMhlanga. 

ICasric iza kulo mdlalo nje, icoshe iphuzu ibambana ngo 0-0 ne-Orbit College ngoLwesithathu, kowomlenze wokuqala e-Olympia Park, eRustenburg. 

Ngesifanayo nakwiCity nayo ebambane ngo 0-0 ne-Orbit ngoMgqibelo, eCape Town Stadium, eKapa. 

Ngokwamaphuzu, i-Orbit yiyona esazihola ngamaphuzu amabili emidlalweni emibili ewathole idlala ngokulingana emidlalweni emibili yakamuva. 

“Emdlalweni wethu wokuqala ne-Orbit sikwazile ukubuya nephuzu yize kungikhathaza ukuthi asikwazanga ukuthola igoli kuloya mdlalo phezu kokuba kuyithina esathola amathuba amaningi okufika emapalini kune-Orbit. 

"Nokho okubalulekile manje wukuthi kulo mdlalo esiyowudlala neCape Town City silwele ukuthola igoli nokuwina ngoba ngeke kusisize ukuthola iphuzu elilodwa nasemdlalweni wethu wesibili.

"Kuzomele sikusebenzise ngendlela ezovuna thina ukudlalela enkundleni yethu iSolomon Mahlangu, okuyinkundla enginesiqiniseko sokuthi izobathwalisa kanzima abadlali beCape Town City abajwayele ukudlala ezinkundleni ezingcono kwiPremiership,” kusho uMthombeni.

ICasric ne-Orbit abaqede endaweni yesithathu neyesibili kwi-log yeMotsepe Foundation Championship, basemshikashikeni wokulwela ukukhuphukela esigabeni seBetway Premiership, ngenkathi iCity eqede endaweni ka-15 kwi-log yePremiership, yona izabalazela ukungagawulwa yizembe iyodlala kwiChampionship ngesizini ezayo.

Ngakolunye uhlangothi, iCasric sekungokwesibili ibamba iqhaza kule midlalo yokuhlunga, kwazise nangesizini ka-2022/23, yadlala kule midlalo ibanga neCape Town Spurs neMaritzburg United (esiyiDurban City), kwagcina kuphumelele iSpurs kule midlalo yakhushulelwa kwiPremiership. 

“Sekungokwesibili manje sidlala ama-Play Offs, sesiyakwazi okufunekayo emidlalweni yalolu hlobo ukuze uphumelele kuyona. 

"Safunda emaphutheni ethu angesizini ka-2022/23, lapho kwaphumelela khona iCape Town Spurs, ngakho kungaba yinto ebuhlungu ukuthi siphinde sihluleke futhi. 

"Sizolwa kuze kube ngumdlalo wokugcina, sithandazele nokuthi inhlanhla ibengakithi, sigcine sikwazile ukufeza iphupho lethu lokukhuphukela kwiPremiership.

"Nesipiliyoni somdlali onjengoKermit Erasmus, yisona esisidingayo emidlalweni yalolu hlobo,” kuqhuba uMthombeni. 

Ngemuva kowakusasa neCity, iCasric izodlala owomlenze wesibili ekhaya ne-Orbit ngoMgqibelo, bese ivala neCity ekuhambeni ngoJuni 30.

Imidlalo yamaPromotion Play-Offs ePSL: 

Kusasa: 

Casric Stars v Cape Town City (Solomon Mahlangu Stadium, 3pm)

NgoMgqibelo:

Casric Stars v Orbit College (Solomon Mahlangu Stadium, 3pm)

NgoJuni 25:

Orbit College v Cape Town City (Olympia Park, 3pm)

NgoJuni 30:

Cape Town City v Casric Stars (Cape Town Stadium)