Libhekwe kwamathathu elizodla umhlanganiso kwiDundee July

UBONA ingqwele yanonyaka yeDundee July Horse Racing, izophuma phakathi kwamahhashi amathathu okubhekeke ukuba adlane imilala kube ncane indawo, usihlalo weKwaZulu-Natal Rural Horse Racing Association, uMenzi Buthelezi.

UButhelezi ukusho lokhu ngesikhathi kwethulwa iDundee July Horse Racing izolo, emagcekeni kaMasipala waseNdumeni, eDundee. 

Lo mjaho wodumo wamahhashi omtelebhelo uzogijinywa ngoJulayi 19, eNdumeni Horse Track, eDundee.

Kubhekwe uMbayimbayi wasesifundeni saseZululand, uBhulamngoma waseHarry Gwala, noNxakanxaka waseMajuba, phakathi kwamahhashi okubhekeke kuphume kuwo elizodla umhlanganiso.

UMbayimbayi nguyena ovikela isicoco salo mjaho awunqoba nyakenye, wakhala wemuka nesamba sika-R350 000. 

Kanti uNxakanxaka uza kulo mjaho nje, uthelwe ngezibonkolo kulandela ukudla umhlanganiso kwiNkandla May.

“Emjahweni wakulo nyaka kubukeka zizodlana imilala okwangempela, alikho ihhashi okubukeka lizozidlela amahlanga, kodwa phakathi kukaMbayimbayi, uBhulamngoma noNxakanxa kubukeka kungase kuphume kuwo ingqwele yakulo nyaka. Akhona-ke namanye amahhasi asethubeni lokudlisela ogageni lawa esengiwabalile, okubalwa kuwo u-Alfa no-Omega, uMpendulo, uCall Chester, u-Album noBarcelona,” kusho uButhelezi, oveze ukuthi ihhashi laseMpumalanga sebelithengile sekungelaKwaZulu-Natal.

U-Alfa no-Omega okuyihhashi laseMpumalanga elike ladlisela ogageni amahhashi akulesi sifundazwe kwiDundee July, ligcine ukunqoba lo mjaho ngo-2023.

Lo mcimbi wokwethulwa kweDundee July bewuhanjelwe nguMphathiswa woMnyango wezeMidlalo, ezobuCiko namaSiko, uMnuz Mntomuhle Khawula, uDkt Thobile Sifunda oyinhloko yomnnyango, iMeya kaMasipala waseNdumeni, uMnuz Mcebo Mkhize nezinye izimeya.

Kuvele ukuthi isiqubulo somjaho wanonyaka, sithi “Isukile”.

UKhawula uveze ukuthi babheke izinga eliphezulu emjahweni wanonyaka futhi nomklomelo uzonyuka ngenxa yokuzinikela kwabaxhasi abehlukene.

“Kusihlaba umxhwele njengomnyango ukubona lo mjaho udlondlobala ngale ndlela. Engingakuveza nje wukuthi umklomelo wakulo nyaka uzokwenyuka ngesamba engingeke ngisidalule okwamanje ngoba angifuni ukubagijimela phambili abahleli kodwa engingakuveza ukuthi abaxhasi bethu singumnyango bagcina beme ku-R1,9 million nyakenye, kodwa kulo nyaka sesidlulile ku-R3 million."

Uthe uthemba ukuthi kuyothi kushaya uJulay 19, bayobe sebelunguze ku-R4 million.

IMeya yaseMzinyathi, uNkk Thembisile Mchunu, ithe: "Sifuna imali isale la eMzinyathi, ngakho sinethemba lokuthi elinye lamahhashi akulesi sifunda uMzinyathi yilona elizodla umhlanganiso. Ukukhula kwalo mjaho kukhulisa umnotho wesifunda saseMzinyathi kunike nosomabhizinisi bendawo amathuba okuhlomula.”

Phakathi kwabasiki bengqephu okubhekeke bashiyelane inkundla ngomsebenzi wabo, kubalwa uMthunzi Mthembu we-M Shade, noNoluthando Madida weThando Crochet.