ISundowns ayikagudluki esicongweni se-log yeSuper League

IMIPHUMELA yemidlalo emibili yangempelasonto ayenzanga mehluko kwi-log yeHollywoodbets Super League njengoba iMamelodi Sundowns Ladies neTS Galaxy Queens kuyiwona maqembu asazihola phambili kwi-log yalesi sigaba. 

Yize iSundowns ingayiqalanga ngendlela ejwayele isizini njengoba isihlulwe imidlalo emibili kwengu-13 esayidlalile kodwa yiyona esaqhwakele kwi-log ngamaphuzu angu-31.

Ilandelwa yiGalaxy endaweni yesibili ngamaphuzu angu-27. IGalaxy isendaweni yesibili ngenxa yomehluko wamagoli phakathi kwayo neJVW FC neTUT Football Club, abasendaweni yesithathu neyesine ngokwehlukana ngamaphuzu angu-27. 

Mibili kuphela imidlalo yeHollywoodbets Super League edlalwe ngempelasonto ngenxa yokuthi iningi labadlali abamqoka bamaqembu akulesi sigaba, ikakhulukazi abeSundowns nabeGalaxy, baseqenjini lesizwe iBanyana Banyana elizodlala koweWomen’s Africa Cup of Nations (Wafcon) ezoba seMorocco kusukela ngoJulayi 5 isongwe ngoJulayi 26.

I-University of Pretoria idlale ngokulingana ne-University of Cape Town, kwathi iFirst Touch Ladies yabambana ngo 1-1 neRichmond Ladies. 

Kule sizini kubukeka lizogaya ngomunye umhlathi ngombango wesicoco seligi njengoba iGalaxy ikhombisa ukuba yiqembu elingcono kakhulu kule sizini nelingase libe yizimbangi ezinkulu kwiSundowns ehlale ikhonya kulesi sigaba.

Kanti kula masizini edlule bekuvame ukuthi kube yi-University of Western Cape (UWC) emisa kanzima iSundowns. Nokho kule sizini ayiqalanga kahle. 

Imiphumela yeHollywoobets Super League: 

University of Pretoria 1-1 University of Cape Town; First Touch Ladies 1-1 Richmond Ladies