XOLILE MPISANE
IHOLLYWOODBETS Dolphins isasethubeni lokunqoba isicoco seCSA One Day Cup njengoba izobhekana neMomentum Multiply Titans emdlalweni owandulela owamanqamu namuhla ntambama.
Lo mdlalo ozoba seHollywoodbets Kingsmead Stadium, uzoqala ngo-1pm.
IDolphins ibiqede endaweni yesine kwi-log ngesikhathhi kusongwa imidlalo yamaqoqo. Nokho, igcine isikhushulelwa endaweni yesibili kulandela isinqumo esimenyezelwe yiCricket South Africa (CSA) ngoMsombuluko.
ICSA ithole iqembu lase-Eastern Cape, iDafabet Warriors, linecala lokuhluleka ukulandela omunye wemithetho ngesikhathi libhekene neDolphins ngoFebhuwari 16.
Ngokwemithetho yeCSA, wonke amaqembu adinga ukufaka okungenani abadlali abathathu abamnyama eqenjini labadlali abangu-11 kuyona yonke imidlalo.
IWarriors isebenzise abadlali abamnyama ababili kuphela ngesikhathi ibhekene neDolphins, u-Andile Mokgakane noSinethemba Qeshile. Ngenxa yalokhu, iphucwe amaphuzu ewathole ngokunqoba lo mdlalo, anikwa iDolphins.
Iphinde yahlawuliswa isamba semali iCSA engasidalulanga esitatimendeni sayo. Kufanele ikhokhe ingxenye yaso ungakapheli u-Ephreli, kanti enye esele izolengiswa iminyaka emihlanu ngaphansi kombandela wokuthi ingatholwa inecala elifanayo.
Iqembu elizophumelela namuhla ntambama phakathi kweDolphins neTitans lizobhekana neGoldrush Boland kowamanqamu ngeSonto.
Umqeqeshi weDolphins, uQuinton Friend, ujatshuliswa wukuthi iqembu lakhe lizongena kulo mdlalo womkhumulajezi lizethemba njengoba linqobe yomine imidlalo yokugcina yamaqoqo.
“Ngihlabeke umxhwele ngomgqigqo ezikwazile ukuwubamba kulo mqhudelwano. Akulula neze ukunqoba imidlalo emine ilandelana,” usho kanje lo mqeqeshi.
“Ngijabule ngezinga esikulona. Kuthathe isikhathi ukuthi iqembu lijwayele izinto engifike nazo njengomqeqeshi. Ngiyaziqhenya ngabadlali nalokhu asebekuzuzile bendawonye."
IDolphins yagcina ukuphakamisa indebe ye-One Day Cup ngesizini ka-2020/21 ngokubambisana neLions. La maqembu kwakufanele aqhuthane kowamanqamu kodwa wagcina ungadlalwanga ngenxa yemvula.