IChiefs nenqwaba yamaqembu embangweni weTop 8

UYAQINA umbango wokuqeda ezindaweni ezingcono kwiBetway Premiership njengoba sekusele kancane kusongwe isizini ka-2024/25.

Yize kubukeka sengathi iMamelodi Sundowns ne-Orlando Pirates basele bodwa embangweni wesicoco, kodwa maningi amaqembu asethubeni lokuqeda endaweni yesithathu ekunikeza igunya lokuyodlala kwiCaf Confederation Cup ngesizini ezayo.

Ngaphandle kwalokho, uyashuba nombango wokuzibekisela indawo kwi-MTN 8 kwazise aseyinqwaba amaqembu asethubeni lokuqeda kwiTop 8.

Amaqembu amathathu aphezulu kwi-log, iSundowns, Pirates neStellenbosch FC, azobe ematasa emidlalweni yeCaf kule mpelasonto, kodwa ziningi izinguquko ezibhekiwe kwi-log ngenxa yemidlalo yeligi.

IChiefs, esabambelele endaweni yesishiyagalombili ngamaphuzu angu-30 emidlalweni engu-24, inenselelo yokuvikela isikhundla sayo njengoba izobhekana ngqo neqembu eliyilandelayo, iChippa United, enamaphuzu angu-29 emidlalweni engu-22.

La maqembu azodudulana eNelson Mandela Bay Stadium eGqeberha, namuhla ngo-5.30 ntambama, azi ukuthi uma kwenzeka eqhuzuka angazibeka engcupheni yokudlulwa yilawa awalandela eduze njengeLamontville Golden Arrows, Magesi FC neMarumo Gallants.

Abafana Bes’thende banamaphuzu angu-28 emidlalweni engu-21, iMagesi inangu-26 emidlalweni engu-24 kanti iGallants nayo inangu-26 emidlalweni engu-24.

I-Arrows izovakashela iGallants eDr Molemela Stadium, eBloemfontein mauhla ngo-3 ntambama, iMagesi itholane phezulu neTS Galaxy eSeshego Stadium, ePolokwane, kusasa ngo-3 ntambama.

Imidlalo yeBetway Premiership:

Namuhla: Marumo Gallants v Lamontville Golden Arrows (3pm - Dr Molemela Stadium), Chippa United v Kaizer Chiefs (5.30pm - Nelson Mandela Bay Stadium), Sekhukhune United v Polokwane City (5.30pm - Old Peter Mokaba Stadium).

Kusasa: Magesi FC v TS Galaxy (3pm - Seshego Stadium).