UKUBEKWA kwemiklomelo econsisa amathe nguMnyango wezeMidlalo, ubuCiko nezamaSiko KwaZulu-Natal ezohlonyulwa ngabagijimi bakulesi sifundazwe abazokwenza kahle kwiComrades Marathon, kufanele kube yisikhuthazi sokubuyisa isithunzi selikaMthaniya.
Kusasa ezintatha, kuzoguga iteku emjahweni webanga lika-89.98km kwehliwa kusukwa ePietermaritzburg City Hall, eMgungundlovu, kubhekwe ePeople’s Park, eThekwini.
Phezu kwemiklomelo yeComrades ekhushulwe nyakenye, uMnyango wezeMidlalo esifundazweni ubeke eyayo emjahweni wakulo nyaka.
Umgijimi ozophuma phambili kwabaKwaZulu-Natal uzohlomula ngoR60 000, isibili kube uR40 000, isithathu kube uR20 000.
I-KZN yagcina ngoBongumusa Mthembu ngo-2018 ukuba nomgijimi ongowomsinsi wokuzimisela esifundazweni odle umhlanganiso kulo mjaho, eshaya intambo ngesikhathi esingu-6:10:03 kusukwa eMgungundlovu kubhekwe eThekwini.
UMthembu (41) we-Arthur Ford Athletic Club osenqobe lo mjaho amahlandla amathathu, waba ngumgijimi wesibili wakulesi sifundazwe owanqoba lo mjaho ngo-2014, elandela uShaun Meiklejohn owaba ngowokuqala eKZN owandla umhlanganiso ngo-1995.
Phakathi kwabagijimi baseKZN abanenselelo yokukhipha amangwevu bahlomule ngale miklomelo, kubalwa uMthembu ophume endaweni yesithupha nyakenye kulo mjaho, Ayanda Ngcobo we-Xcel Running Club noSinethemba Tshangase weNedbank Running Club.
Yize uMthembu esephikwa yiminyaka, kodwa isipiliyoni sakhe salo mjaho singambeka ethubeni uma izimbangi zakhe zenza amaphutha.
UNgcobo ozobe eyigijima okwesithathu iComrades, ukhombisa ukudlondlobala. NgoFebhuwari udle umhlanganiso kwiHillcrest Marathon yebanga lika-42.2km, walala isibili kwiBest of the Best Marathon yebanga lika-42.2km ngoMashi, waphuma endaweni yesibili kwiPrince Mangosuthu Ultra Marathon yebanga lika-52km ngo-Ephreli.
Kanti uTshangase yena unqobe iHarry Gwala Marathon yebanga lika-42km ngoMashi, waqeda endaweni yeshumi kwiPrince Mangosuthu ngo-Ephreli.
Kwabesifazane kubhekwe uJenet Mbhele, uJenna Challenor ozobe eyigijima okokuqala iComrades noFikile Mbuthuma osekhuze ibuya kulo mjaho.
UMbhele osanda kubuyela ekilabhini yakhe endala uMzimkhulu Striders, uthathe isibili kwiMfundo Arnold Lushaba Half Maratho yebanga lika-21km ngoFebhuwari, wathatha isibili kwiPrince Mangosuthu ngoFebhuwari.
Nyakenye uMbhele uthathe indawo yesishiyagalombili kwiComrades ngesikhathi esingu-6:16:54.
Ngonyaka odlule lo mjaho unqotshwe nguPiet Wiersma waseNertherlands weNedbank Club ngesikhathi esingu-5:25:00. Kwabesifazane intambo ishaywe nguGerda Steyn ngesikhathi esingu-5:49:46.