IHollywoodbets izosebenzisana nenkakha yase-England
INKAKHA yebhola yase-England, uMichael Owen, ngesikhathi ithulwa njengenxusa elisha leHollywoodbets.
Image: THULIGRAPHY IMAGES
INGWAZI yebhola lase-England, uMichael Owen, iqinise ubudlelwano bayo nezemidlalo zaseNingizimu Afrika ngesikhathi yethulwa njengenxusa elisha lenkampani yokubheja iHollywoodbets.
Lokhu kwenzeke emcimbini obubanjelwe eHollywoodbets Greyville Racecourse, eThekwini ngoLwesithathu ntambama.
Lesi simemezelo sihehe inqwaba yabalandeli bebhola abaphinde babukela imidlalo eyandulela owamanqamu ye-Africa Cup of Nations kumathelevisini amakhulu kule nkundla okugijima kuyona ammahhashi.
U-Owen, owaduma edlalela amaqembu okubalwa kuwona iLiverpool, Real Madrid, Manchester United namanye, wadlalela nelesizwe lase-England, ujoyine uhlu lwamanxusa ale nkampani okubalwa kulona izinkakha zebhola, umbhoxo, ikhilikithi, amahhashi nokunye.
Ngaphandle komsebenzi wakhe ocomekayo awenza esadlala ibhola, u-Owen, osengumhlaziyi webhola kwithelevishini. Unesitebele samahhashi esaziwa ngeManor House Stables.
Ekhuluma ngesikhathi kwethulwa, u-Owen uthe uzizwe esekhaya ngendlela amukelwe ngayo yithimba leHollywoodbets kanye nabantu baseNingizimu Afrika.
"Ngikuthokozele kakhulu ukuchitha isikhathi namanye amanxusa kulezi zinsuku ezimbalwa ezedlule. Ngisheshe ngazizwa ngiyingxenye yalo mndeni. Bangamukele ngezandla ezifudumele futhi ngingasho nje ukuthi bonke abantu baseNingizimu Afrika banempatho,” kusho u-Owen.
"Kubalulekile ukuphumela ngaphandle wenze izinto ezahlukene uma usuqedile ukudlala ibhola, ungazivaleli endlini. Ubudlelwano obufana nalobu esibuqalile neHollywoodbets buzongisiza ngoba ziningi izinto esihlele ukuze ndawonye kuleli naphesheya.”
UDevin Heffer oyiBrand and Communications Manager yaseHollywood u-Devin Heffer uthe uthando luka-Owen lwebhola namahhashi lwenza lobu kube wubudlelwano obukhethekile.
“Ukuba nomuntu owenza lukhulu ebholeni futhi onothando lwamahhashi yinto enhle kakhulu futhi eyivelakancane. SiyiHollywoodbets asifuni ukuphelela eNingizimu Afrika kuphela kodwa sifuna ukusabalala emhlabeni wonke. UMichael ukubonile lokho, useyingxenye yomndeni wakhe futhi ngiyethemba ukuthi kuningi okuhle okuzoqhamuka kulobu budlelwano,” usho kanje uHeffer.