USibisi neseluleko kuNdamane obheke kwiDowns

UDIYO Sibisi ukholwa wukuthi sekusezandleni zikaKhulumani "Mtara" Ndamane, ongumdlali wasemuva osuka kwiTS Galaxy, ukukhombisa ukuthi kungani esayiniswe yiMamelodi Sundowns. 

UNdamane (21) odabuka KwaNomoya, eSahlumbe, ungumkhaya kaSibisi owake waba semabhukwini eSundowns yize agqama kakhulu njengomgadli emaqenjini okubalwa kuwona iFree State Stars neMaritzburg United. 

Lo mdlali kulindeleke ukuthi ethulwe maduze njengomunye wabadlali abasha abasayiniswe yileli qembu kuleli windi likaJanuwari lokuhwebelana nokubhaliswa kwabadlali. 

Bekuvele kulindelekile ukuthi lo mdlali ajoyine iSundowns kuleli windi likaJanuwari, kwazise usayine inkontileka yesibambiso naleli qembu laseChloorkop. 

Ukusayina kwalo mdlali kuqinisekiswe nangusihlalo weGalaxy, uTim Sukazi, ekhuluma kwiKwekwezi FM ngeSonto ntambama, wadalula nokuthi babevele benesivumelwano neSundowns sokuthi ayijoyine ngoJanuwari. 

“Yithuba eliyingqayizivele leli kuKhulumani ukuthi ajoyine iqembu elinjengeSundowns okuyiqembu elihlale lilwela ukuwina izindebe nelihlale lidlala kwiCaf Champions League masizini wonke, okuyinto ezomkhulisa kakhulu njengomdlali ikakhulukazi njengoba esevele eyingxeye yeqembu lesizwe iBafana Bafana,” kusho uSibisi. 

“Nokho, okufanele akuqonde manje wukuthi iSundowns ayodlala kuyona ihlukile kuneqembu asuka kulona, usezoba semehlweni abezindaba kakhulu manje kunakuqala.

Ingcabha isikuyena-ke manje ukuthi akhombise ukuthi ayimsayinisanga ngephutha iSundowns, kodwa imsayinise ngoba engumdlali oseqophelweni futhi osezingeni lokuncintisana nabanye abadlali basemuva beSundowns abaseqophelweni.”

UNdamane ojoyine iGalaxy ngesizini edlule esuka eqenjini leKaizer Chiefs leDStv Diski Challenge, ufike walenza elakhe ijezi kuleli qembu emuva maphakathi nendawo, okwenze wathatha amehlo omqeqeshi weBafana njengoba ebambe iqhaza emidlalweni yokugcina leli qembu lidlala imidlalo yokuhlungela ukuzibekisela indawo kwiNdebe yoMhlaba.

Waphinda waqokwa eqenjini ebeliyibambe kwi-Africa Cup of Nations (Afcon) eMorocco muva nje.

KumaSandawana uzobanga ijezi nabadlali okubalwa kubo uGrant Kekana, uMusa Lebosa, uMothobi Mvala, uMalibongwe Khoza noKeanu Cupido.

AmaSandawana okuyiwe ekhefini le-Afcon esendaweni yesibili kwi-log yeBetway Premiership azovula unyaka ngomdlalo wasekhaya ne-Orbit College ngoJanuwari 19 eLoftus Versfeld Stadium, ePitoli.

Ngemuva kwalo mdlalo azokwamukela i-Al Hilal Omdurman yaseSudan koweChampions League ngoJanuwari 23 eLucas Moripe Stadium, e-Atteridgeville.