USuthu luqinise inkulisa ngowaduma kwiPirates

IZINGUQUKO zakamuva eqenjini laMaZulu FC elidlala kwiDStv Diski Challenge kubukeka zifakazela okuhlale kushiwo ngumengameli waleli qembu, uSandile Zungu, ngokuqinisa izinhlaka zokukhulisa abadlali kuleli qembu.

UZungu uhlala eshumayela ivangeli lika-Project 32 okuwumgomo Usuthu ulihlose ngawo ukuqinisekisa ukuthi kufika u-2032 wokuhlanganisa iminyaka engu-100 leli qembu lasungulwa  selinezinhlaka ezisezingeni eliphezulu ezikhiqiza abadlali beqophelo eliphezulu. 

AmaZulu ahlukane nabaqeqeshi abahlanu abebesezinhlakeni zoSuthu okubalwa kubona uCelokuhle Mbanjwa obeyi-Youth Techical Director, umqeqeshi weqembu leDiski uMncedisi “Dada” Sibiya, umqeqeshi welika-Under 19 u-Andile “Sguda” Cele nomqeqeshi ka-Under 15, uNqoba Dladla.

Usuthu seluqashe uKert Lentjies kwesokuba ngumqeqeshi weqembu leDiski noThabo “Jahman” Mngomeni kwesokuba yiphini lakhe. Lubuyise no-Ayanda Mkhize oluthungathela abadlali, ohlukane naleli qembu ngo-2023 ngezizathu ezingadalulwanga. 

ULentjies oke waqeqesha kwiChippa United, ujoyina uSuthu nje ubegcine ukubonakala kwi-FC Ravens edlala kwi-Eastern Cape ABC Motsepe League. 

UMngomeni wodumo kwi-Orlando Pirates neBafana Bafana, ubeyiphini likaVela Khumalo eqenjini lesizwe lika-Under 17, Amajimbos, ebeliyibambe kwiNdebe yoMhlaba ka-U/17 eQatar ngoNovemba. 

“Ngikholwa wukuthi lezi zinguquko ezenziwe ngaMaZulu ethimbeni labaqeqeshi leDiski, nokulanda u-Ayanda (Mkhize), ziyinkomba yokuthi leli qembu lisezinhlelweni ezinqala zokuqinisa izinhlaka zabadlali abasathuthuka nokuhlonza ithalente ngendlela okuyiyona. 

Ngokwami, kwasekuqaleni kwakuvele kube yiphutha ukuhamba kuka-Ayanda ngenxa yomsebenzi oncomekayo abewenzela iqembu.

Kumasizini edlule ukwazile ukutholela iqembu abadlali abanohlonze abanjengoSiphesihle Maduna, Siyethemba Sithebe, nabanye,” kusho uNhlanhla “Shakes” Zwane, owayengumdlali wasesiswini kuMaZulu eminyakeni edlule. 

UZwane ubona ukusondeza uMngomeni kuyisu eliphusile ngasohlangothini loSuthu, ngenxa yokuqonda kwakhe ukusebenza nabadlali abasebancane emaqenjini esizwe. 

“Ulwazi asenalo (uMngomeni) lokusebenza nabadlali abasebancane eqenjini lesizwe ngibona kuzolisiza iqembu ngokufanele likwenze ukuze abadlali balo abasebancane bakulungele ukudlala emaqenjini esizwe abasakhula anjengo-Under 17 no-Under 20 (Amajita),"usho kanje.

Iqembu loSuthu leDiski okuyiwe ekhefini lamaholidi kaDisemba lisendaweni yesishiyagalolunye kwi-log yeDiski Challenge, lizovula unyaka ngomdlalo wasekhaya ne-Orlando Pirates ngoJanuwari 11 ePrincess Magogo Stadium, KwaMashu.