UMngqithi akayiboni yehlelwe yizinga iDowns
UMANQOBA Mngqithi weLamontville Golden Arrows ekhuluma noSabelo Sithole, ongomunye wabafana abancane abakhombisa unyawo oluhle kwiBetway Premiership
Image: Backpagepix
UMQEQESHI weLamontville Golden Arrows, uManqoba “TV” Mngqithi, uvule isifuba ngoshintsho oluzolethwa wukuwina kwiMamelodi Sundowns "engashayeki" kubadlali bakhe abese beqala ukudikibala nokuzingabaza ngenxa yokwehlulwa ngemizuzu yokugcina.
UMngqithi owaxoshwa yiSundowns ngoDisemba, nyakenye, endaweni yakhe kwangena uMiguel Cardoso, ube wumqeqeshi wokuqala kule sizini oguqise ompetha beligi asebeyidle amahlandla ayisishiyagalombili kulandelana.
Abafana Bes’thende banqobe ngo 1-0 wegoli likaJunior Dion ngoLwesithathu, eKing Zwelithini Stadium, eMlaza.
Emdlalweni weligi we-Arrows neSekhukhune United ngeledlule, iguqe ngo 1-0 wegoli alingene ngomzuzu wokugcina likaBradley Grobler. Ngaphambi kwalokhu, ibishaywe yiPolokwane City ngomzuzu wokugcina ikade ihamba phambili.
UMngqithi opheka i-Arrows eyamukele iSundowns isishaywe imidlalo yeligi emithathu ilandelana, utshele abezindaba emuva komdlalo ngebanga lomphumela ongalihamba ekuguquleni izinhlanhla zaleli qembu.
“Amagoli angaphezulu kwelilodwa besingawathola kulo mdlalo kodwa akufanele sikhohlwe ukuthi abadlali bangene enkundleni benovalo nokuzenyeza kwazise besisuka endukwini emidlalweni emithathu ilandelana,” kusho uMngqithi.
“Akuyona into elula ukuhlanganisa iqembu ngabafana abancane kwazise nezinkulumo ezivela ngaphandle kwenkundla ziyafinyelela ezindlebeni zabo.
“Ngijabulele bona (ababadlali) kakhulu ngalo mphumela ngoba ngaphandle kokubabuyisela emgqeni nokubakhumbuza ikhono abaliphiwe nguMdali, ubani uzobakhumbuza ukuthi lokhu abakuzwayo ngaphandle kwenkundla akufanele bagxile kukona?
“Lo mphumela uzoqaqa okuningi. Uzokwenza abadlali bazethembe kakhulu ngoba lokhu abakwenzile sekuhlule amaqembu amaningi abunjwe ngalo lonke ubisi lwabadlali ongalucabanga."
Lo mqeqeshi owahlala iminyaka engaphezulu kwengu-10 kwiSundowns, uthe akalona uhlobo lomuntu ojatshuliswa wukushaya iqembu ake asebenza kulona.
“Angiboni ukuthi kufanele ngikujabulele ngendlela ehlukile ukunqoba kwiSundowns ngoba ngesikhathi ngisebenza kuyona yangenzela okuhle kodwa, hhayi mina ngedwa kepha nomndeni wami.
“Ngiyakholelwa ekutheni akuwona umqondo ophusile ukuyela iSundowns ngobuso ngoba ngokwami isaqine ngendlela efanayo nangesizini edlule.
“Wonke amaqembu ayaficwa yisikhathi lapho abadlali abasha besasuke bezijwayeza khona ngakho-ke uma sekwenzeke lokho iSundowns izobuyela ekubeni yiqembu elingashayeki,” kusho uMngqithi.