UMbule ushayeke ngaphakathi ngakufice kwiPirates
USIPHO "Master Chef" Mbule ongawuvali umlomo ngomsebenzi 'wezinhloli' zaleli qembu kusukela efikile kulona ezinyangeni ezedlule
Image: OP/Facebook
UMDLALI omusha osephenduke isithandwa sabalandeli be-Orlando Pirates, uSipho “Master Chef” Mbule, uhlabeke umxhwele ngomsebenzi ‘wezinhloli’ zaleli qembu azichaze njengesibusiso kubadlali kwazise zibenzela okuningi kube lula enkundleni.
UMbule osesize iPirates yavikela i-MTN8 kule sizini, akawuvali umlomo ngomsebenzi wethimba labaqeqeshi kwiPirates elibhekene nokuqoqa ulwazi ngezitha ezisuke zizobhekana naleli qembu.
IBucs eqale ngonyawo oluhle kowomlenze wokuqala weyokuhlungela imidlalo yamaqoqo yeCaf Champions League ngokunabisa iLioli FC yaseLesotho ngo 3-0 ngempelasonto edlule, izovakashela iSiwelele FC koweBetway Premiership namuhla ngo-7.30 ebusuku eFree State Stadium, eBlomfontein.
UMbule usedlale emaqenjini ahlonishwayo ebholeni laseNingizimu Afrika okuyiSuperSport United, Mamelodi Sundowns neSekhukhune United.
Yize evamise ukulandelwa yimibiko engemihle ngezinto azenza ngaphandle kwenkundla kodwa kusukela efike kwiPirates ngasekuqaleni kwesizini ungundabizekwayo ngakwenza ensimini.
Lokhu sekumbuyisele nasemehlweni omqeqeshi weBafana Bafana, uHugo Broos.
UBroos kumele anqume ngomdlali ozovala isikhala sikaThemba Zwane uma kushaya isikhathi sokuya kwi-Africa Cup of Nations (Afcon) eseMoroco ngoDisemba engakalulami kwazise noPatrick Maswanganyi oke awenze lo msebenzi wehlelwe yifomu.
“Ngeke ukunake lokhu le ngxenye yethimba labaqeqeshi esenzela khona kodwa kuwusizo ngendlela eyisimanga uma ususenkundleni ngoba nezinqumo ozithathayo zisuke zisukela elwazini esifika enkundleni sesinalo,” kusho uMbule ngesikhathi ekhuluma ne-Orlando Pirates TV.
“KwiChampions League besingenalwazi ngezitha zethu zaseLesotho kodwa sifike enkundleni izinto zenzeka ngendlela efana ncamashi nale ebesithishiswe ngayo.
“Akukhona ukuthi ngibukela phansi amaqembu esengike ngasebenza kuwona kodwa akulula ukuziba ukuthi umsebenzi ‘wezinhloli’ ngiwubona ngeso elihlukile kusukela ngifike kwiPirates.
“Kufana nesibusiso kumdlali webhola ukuthola ulwazi olumqoka njengalolu esiya emidlalweni lugcwele emakhanda kithina."