Amakhosi aqhakambisa eyokuvika ihlazo kweyeCaf
BASALE bemangele kanje abalandeli beKaizer Chiefs ngesikhathi ibuyiselwa kwamhlaba yiSekhukhune United emdlalweni weBetway Premiership
Image: ITUMELENG ENGLISH
KUZOFANELE basheshe balidlulise "iphutha" lokushayelwa ekhaya yiSekhukhune United abadlali beKaizer Chiefs ukuze umqondo wabo uzolungela umdlalo wokuhlungela eyamaqoqo yeCaf Confederation Cup kwazise uma beqhuzuka nakhona kuzoba yihlazo elesabekayo.
Lena yintshumayelo ithimba labaqeqeshi beChiefs elithembise ukuyifaka igxile emakhanda abadlali njengoba leli qembu lizobhekana neKabuscorp S.C.P. yase-Angola, kowomlenze wokuqala kwiConfed Cup ngoMgqibelo ngo-5 ntambama, e-Estadio 11 de Novembro, eBelas, eLuanda.
Abaqeqeshi beChiefs bebekhuluma ngemuva kokubuyiselwa kwamhlaba yiSekhukhune ibathela induku ka 3-1 obekungokokuqala kule sizini kwiBetway Premiership ngoLwesibili ebusuku, e-FNB Stadium, eNasrec.
Bakholelwa ekutheni okwenzeke beshaywa yiSekhukhune yiphutha abazolilungisa ngakho-ke kabangisiboni isidingo sokuxhamazela ngenxa yalo mphumela.
Ngokwaleli thimba okuningi bakwenze ngendlela koweSekhukhune kwaphika inhlanhla ngakho-ke amaphaphu phansi kubalandeli. Bagcizelele ukuthi kusemqoka kunakho konke ukuthi basheshe balidlulise leli phutha kumbe ukuphoxeka ngoba banomdlalo omqoka ngempelasonto.
Amakhosi abuyela emidlalweni yase-Afrika okokuqala eminyakeni emine kulandela ukunqoba kwawo iNedbank Cup kwi-Orlando Pirates ngesizini edlule, osekungumlando ukuthi iqede ngale nkomishi indlala yeminyaka engu-10.
Laba baqeqeshi bamile ekutheni iqembu elikhulu njengeChiefs akufanele liphume kusahlungelwa eyamaqoqo emidlalweni yeCaf, yingakho lizobahlala entanyeni abadlali ngokuthi bangagxili kulo mphumela omubi abawuthole kwiSekhukhune ngoba iqiniso wukuthi vele ibingcono kunabo ngokomdlalo osukwini.
Bakubona kungaba yiphutha elikhulu ukungawuhleleli ngendlela umdlalo weCaf ngoba uma bezithambisa kuwona bayazi ukuthi bazophuma umqhudelwano ungakaqali okuzoba yihlazo elesabekayo. IChiefs kufanele iwuwine lo mdlalo onemilenze emibili ukuze izodlulela esigabeni esilandelayo kwiCondederation Cup.