UMabele ulobizela elinye ithuba ne-Orbit kwiBetway
ISETHENJWA somdlali we-Orbit College, uSiyabulela Mabele, ongomunye wabadlali ababambe iqhaza elikhulu ekukhushulelweni kwaleli qembu kwiBetway Premiership usalobizela elinye ithuba kuleli qembu ngesizini ezayo yize esemabhukwini e-Orlando Pirates embolekisile
Image: BACKPAGEPIX
UKUVELELA ezitekini zebhola zasemakhaya nokupikwa ngamaqembu ahlukene yikho okwacija uSiyabulela “Tifiza” Mabele, kwamphendlela nethuba lokuyodlala kwi-Orbit College eyiqembu elisanda kukhushulelwa esigabeni seBetway Premiership.
UMabele (22) ungomunye wabadlali abaklame indima ekukhushulelweni kwiPremiership kwe-Orbit ngokudla umhlanganiso kumaPSL Promotion Play-Offs ngoJuni, ilandela ozakwabo ebiyibambe nabo kwiMotsepe Foundation Championship, iDurban City, okuyiyona edle isicoco seligi yeChampionship ngesizini edlule ka-2024/25.
Lesi sikhwishikhwishi somdlali wasophondweni lwesokudla esidabuka e-Uitval, eMnambithi, sesibe kuleli qembu laseNorth West amasizini amane kusukela ngeka-2021/2022 lisadlala kwiSafa ABC Motsepe League, lakhushulelwa kweseMotsepe Championship ngeka-2022/23, njengoba selikhushulelwe kwesePremiership.
“Bengidlala iziteki ngakithi emakhaya e-Uitval, nakwaHlathi, ngipikwa ngamaqembu ehlukene yize iqembu lami engikhulele kulo kuyiSea Robbers, nokuyilapho engathatha khona amehlo abantu abakwazi ukungiphendlela indlela yokuyodlala ibhola kwesinye isifundazwe esikude nasekhaya.
Bengidlala iziteki kuphela ngakithi ngoba ngaleso sikhathi iqembu engangidlala kulo iSea Robbers lalingajoyinanga ligi noma i-LFA ngaleso sikhathi.
Sengiphothule u-matric ngo-2020, ngemuva kokudlala kwami komunye umqhudelwano owaziwa ngeSiya 10 Games, kwaHlathi ngo-2021, ngabe sengiphendlelwa ithuba lokuya kwi-Orbit College eyayidlala kwi-ABC Motsepe League ngaleso sikhathi, ngosizo lukaMuzi Kunene, uMsa Mtshali noJames “J” Ntombela, ongumphathi weSea Robbers engangiyidlalela,” kuchaza uMabele ngohambo lwakhe olubheke ebholeni elikhokhelayo.
“Ngafika ngingazi muntu eRustenburg, ngingalazi nolimi lwesiTswana ngiqala nokuphuma ngaphandle kwesifundazwe iKwaZulu-Natal, ngaqala ukudlala eqenjini elidlala kwiligi okokuqala empilweni yami, angabe ngisabheka emuva.
Ukukhushulelwa kwethu kwiMotsepe Championship ngesizini ka-2022/23, kwaba yisiqalo sokufezeka kwamaphupho, kanti ngaphambi kokuba siye kuma-Play-Offs eMotsepe League eMgungundlovu ngaleyo sizini ngase ngisayiniswe yi-Orlando Pirates ngemuva kokudlala kwe-Orbit kwiPirates Cup ngawo u-2022, njengoba namanje ngisesemabhukwini ayo iPirates esangibolekise kwi-Orbit.
Kanti ukukhushulelwa kweqembu kwiBetway Premiership kusho ukufezeka kwephupho leminyaka kusukela ngisadlala iziteki obhuqwini emakhaya,” kuqhuba uMabele.
Ngemuva kokukhushulelwa kwe-Orbit kwiPremiership umqeqeshi waleli qembu, uPogiso Makhoye, uphumele obala ekubeka ngokucacile ukuthi uzofonqa isigqoko kubaphathi bePirates ukuphinda bamboleke uMabele nozakwabo uGomolemo Khoto noNdumiso Ngiba bobathathu abasabolekiswe ngeZimnyama kuleli qembu laseNorh West.
“Okwamanje akukakhulunywa lutho nami ngokuzokwenzeka ngokubolekiswa kwami yiPirates, mhlawumbe ngizozwa uma sengibuyela eRustenburg ukuyoqala ukujima neqembu ngoMsombuluko.
Kodwa mina engingakusho wukuthi ngijabule lapho engikhona njengamanje kwi-Orbit, ngakho ngingalijabulela kakhulu elinye ithuba lokudlala isizini yami yokuqala kwiBetway naleli qembu engisuka phansi nalo nelifana nekhaya kimi.”