I-VW igubha iminyaka engu-75 ngezintsha

U-2026 unyaka obalulekile kwaVolkswagen njengoba le nkampani igubha iminyaka engu-75  yasungulwa.

Imigubho iqalile kwaVolkswagen Group Africa beqinisekisa izinhlelo zabo zanonyaka zokwethula izimoto ezintsha neziza ngomuso embuthanweni waminyaka yonke i-VW Indaba, obusefemini yabo eseKariega, eGqeberha, kuleli sonto.

Nonyaka umgubho uhlanganise nezinye izinkampani ezingaphansi kweVW okuyi-Audi neyezithuthuthu iDucati.

Isikhulu sakwa-VW Group Africa, uMartina Biene, sithe ngonyaka odlule bakhiqize izimoto ezingu-156 837 efemini.

Umthamo omkhulu wazo okungu-119 771 udayiswe emazweni angaphandle kwakuleli kwathi ezingu-37 066 zathengwa amakhasimende aseNingizimu Afrika.

Ujoyine izikhulu zezinye izinkampani ezikhiqiza kuleli ngokukhathazeka ngokwanda kwezimoto ezilandwa ngaphandle, ikakhulu e-India naseChina.

Uthe izinhlelo zabo zokwakha iSUV encane eKariega, iTengo, zihamba kahle ngoba ingase ivezwe okokuqala ngasekupheleni konyaka ngaphambi kokuqala ukudayisa ngonyaka ozayo.

Ngonyaka ozayo uveze ukuthi bazoqala ukwakha iPolo eyi-mild hybrid futhi basazoqhubeka nokuthumela izimoto emazweni ase-Europe kuze kube u-2035.

Uthe uhulumeni kumele uphothule imigomo yemihlomulo ezokweseka abatshala imali ezimotweni ezingama-new energy vehicle, kubuyekezwe intela ukuze ezakhiwe kuleli zibe nentela ephansi nokunye.

Ngaphandle kokugubha iminyaka engu-75 kweVW, intandokazi iPolo igubha iminyaka engu-30 eNingizimu Afrika. I-Audi quattro all-wheel drive system igubha iminyaka engu-45, injini yakwa-Audi eyi-5 cylinder ihlanganisa iminyaka engu-50 ikhona kuthi iDucati igubhe iminyaka engu-100 yaqala.

Ngekota yokuqala yonyaka kwa-VW bazokwethula iPolo Vivo Xpress ekhishwe izihlalo zangemuva kwengezwa isikhala sokulayisha impahla.

Izolandelwa yizinhlobo ezintsha zama-Amarok okuyiStyle enamandla angu-125kW, iDark Label ne-Aventura efuqa 222kW.

I-Polo Vivo izothuthukiswa ngokwengezwa ezokuphepha okuyi-airbag yasezinhlangothini, ikhamera eveza ingemuva uma uhlehla kanjalo nama-sensor asiza ukuthi ungashayisi ngemuva.

Kuyona le kota yokuqala yonyaka kuzokwethulwa iPolo GTI Edition 20 eshintshwe indlela ebukeka ngayo.

Kuzothi ngokuqhubeka konyaka kutheleke iT-Roc entsha sha nebhasi i-T7 Caravelle enenjini engunhliziyombili njengoba ihamba ngophethroli nogesi webhethri elishajwayo.

Empeleni izinjini ezingonhliziyombili yinto abayibeke eqhulwini kwa-VW ngoba ezingama-mild hybrid zizofakwa kumaGolf, Tiguan, Tayron nezinye.

Ngonyaka ozayo zingase zilandelwe ngezingama-plug in hybrid kwiTiguan neTayron.

Kwa-Audi South Africa, abadayise izimoto ezingu-5 350 ngonyaka odlule, bazokwethula iQ3 entsha, Q5 neRS etron GT Performance nonyaka.

I-Ducati, ezohlanganisa unyaka owodwa idayisa ngokugcwele kuleli, izokwengeza amagaraji ayo okukhona neliseMhlanga.

Yethula nezithuthuthu ezintsha okubalwa kuzo iPanigale V4 R, Panigale V4 Lamborghini nezinye.