Kuzokwandiswa isibalo samaloli akhiwa yiVolvo Trucks eThekwini
ILOLI iVolvo FH elisebenzisa ubuchwepheshe be-Euro 6
Image: Sithunyelwe
SIZOKWANDA isibalo samaloli akhiwa kuleli kulandela isimemezelo sakwaVolvo Trucks South Africa sokuthi kusuka ngo-2026 bazokhiqiza anobuchwepheshe be-Euro 6 efemini yabo eseThekwini.
Le femu eyavulwa ngo-2006 ihlanganisa amaloli iFH, FM neFMX adayisa kuleli nasemazweni angomakhelwane.
Ngo-2022 yathuthukiswa ilungiselela ukuqala ukuhlanganisa amaloli anobuchwepheshe be-Euro 5. Njengoba ilungiselela ane-Euro 6, iphinde yengeza okuthile ukuze imelane nomkhiqizo.
ILOLI iVolvo FH Aero elisahlolwa kuleli ngaphambi kokuthi lethulwe
Image: Sithunyelwe
UMattias Rodier, onguMqondisi wezeziMali kwaVolvo Trucks Spouth Africa uthe ukukhiqiza kwabo amaloli ane-Euro 6 kukhombisa ubuholi babo ekuqhamukeni nezindlela zokuthutha ezingayingcolisi imvelo bebe beseka ukuthuthuka kwemboni yezokukhiqiza kuleli.
Abasebenzi bazokwengezelwa ulwazi abanalo ngokuqeqeshwa.
URodier uthe izinga eliphezulu liyisisekelo sakho lonke abakwenzayo kusuka endleleni abadweba ngayo kuya ekwakheni amaloli abo.
Uthe amaloli ahlanganiswe kuleli awafakwa intela eyengezwa kwalandwa ngaphandle esephelele nokwenza bakwazi ukuwabizisa imali ekahle.
Izinjini eziyi-Euro 6 zehlisa indlela eziyingcolisa ngayo imvelo. Lezi zinjini zakhiwa eSweden bese zithuthelwa kuleli.
Ekuqaleni konyaka iVolvo Trucks yethule iloli lamabanga amade iFH ene-Euro 6.
Le nkampani ithe angena khaxa emakethe yakuleli ngenxa yokonga kwawo kudizili nokuphepha.
IVolvo Trucks iphinde yaveza ukuthi iphothula amalungiselelo okwethula iloli elisha iFH Aero kuleli.
Lethulwe emhlabeni jikelele ngo-2024 futhi lakhelwe ukuthutha impahla amabanga amade. Amakhasimende azokhetha phakathi kwelihamba ngogesi noma elihamba ngodizili.