Bayanda abancenga isilomo esihlulwa wukuziphatha
ISILOMO esiwuSipho Mbule abasichaza njengesinekhono elibabazekayo abasincenga ukuba sizimisele okungenani isizini eyodwa kwiPremier Soccer League
Image: BACKPAGEPIX
UKAPUTENI weSekhukhune United uLinda “Figo” Mntambo, ujoyine uhla lwabadlali abancenga uSipho Mbule ukuba ashiye "izindlela zobumnyama" ngoba ukungabi bikho kwakhe enkundleni kuzacisa iPremier Soccer League (PSL).
UMbule obalwa nabadlali abangase bavumbuke kwiKaizer Chiefs, wabolekiswa yiMamelodi Sundowns kwiSekhukhune United ngasekuqaleni kwesizini edlule.
Lo mdlali owayengalitholi ithuba lokudlala ngaphansi kukaRhulani Mokwena, wafika kwiSekhukhune kwezwakala. Udlale imidlalo engu-17, washaya amagoli amabili, wakhela ozakwamo amathathu.
Nokho iBabina Noko imkhombe indlela ingakapheli isizini. Emuva kwalokho kwasabalala izindaba zokuthi ufike ejimini ebukhile. Indaba yokwehluleka ukuziphatha kukaMbule ngaphandle kwenkundla, yaqala ukuvela esadlalela iSuperSport United eminyakeni edlue futhi kwavela yona njengezinye zezinto ezixaka iSundowns ngaye.
UMntambo obeyisimenywa kwi-Arena Sports Show uhambe emazwini kaJabu Mahlangu, Junior Khanye noMichael Nkambule encenga lo mdlali amchaze njengonekhono elikhethekile. UMahlangu noKhanye baxoshwa kwiChiefs ngenxa yophuzo oludakayo.
Bonke laba badlali abagqama kwiChiefs abafihli ukuthi abaneme ngemibiko esabalele ngoMbule.
“Uyalazi ibhola lo muntu okuthiwa uSphola (Mbule). Kunzima ukuthi abantu bangikholwe uma ngithi uMbule unekhono elibabazekayo ngoba bambona ngezinsuku zemidlalo kuphela kanti mina ngikhulumela abaziqeqesha naye nsukuzonke.
“Ukuzethemba okukuyena kuyahalisa. Uyazazi ukuthi uphiwe kunobhutshuzwayo okufakazelwa wukuthi uyasho uma kungelona usuku lokumzela ngobuso. Konke afisa ukukwenza ngebhola uyakwazi ukukwenza ngaphandle kokuphazanyiswa.
“Ngifisa ukuthi ngelinye ilanga uMbule akuqonde ukuthi uphiwe kangakanani ebholeni. Ngiyafisa futhi akhumbule nokuthi isikhathi kasimile, kepha siyahamba.
“Ngaphandle kukaMbule iPSL izacile. Kuningi akuncisha abathandi bakanobhutshuzwayo baseNingizimu Afrika. Ngikhulekela ukuthi okungenani adlale isizini eyodwa ngokuzikhandla nangakho konke anakho. Angingabazi ukuthi angaqokwa njengomdlali ovelele ngoba ikhono lakhe alandile kwi-PSL,” kusho uMntambo.
Ukumataniswa kukaMbule neChiefs kususe ukukhuluma kubalandeli kwazise kukhona abangangabazi ukuthi uzofika ayenze ibe ngcono kanti kukhona abanenkinga ngendlela aziphatha ngayo ngaphandle kwenkundla.
Ezinyangeni ezedlule uMahlangu owadlula esimweni esifanayo, wakhumbuza uMbule ngento efanayo ngesikhathi evakashe emsakazweni (Metro FM).
“Unenhlanhla uMbule ngoba unabantu abafana nathi abadlula kulesi simo abhekene naso.
“Engingamcebisa ngakho ukuthi bonke laba bangani anabo manje yibona abazobe sebemhleba baphinde bamhleke uma engasenawo umsebenzi,” kusho uMahlangu.
UKhanye noNkambule basanda kumncenga uMbule ukuba akhohlwe okunye athokozise abathandi bakanobhutshuzwayo ngomlingo awuphiwe wuMdali.