KUSOLWA iKaizer Chiefs ngokunyukelwa ngushukela isheshe idikile uGeorge Maluleka, ngokumdedela alibhekise kwiMamelodi Sundowns ekupheli kukaJuni. Basola ukuthi ukuhamb kwakhe kube nomthelela ekutheni ihluleke ukuqeda ngombango wesicoco se-Absa Premieship, kwaze kwafika usuku lokugcina lwesizini.
Lokhu kudikila ikwenze emuva kokuvela kwezindaba zokusayina kwakhe inkontileka yesibambiso namaBrazilians.
Yize uMaluleka ebesesayinile neSundowns inkontileka yesibambiso kodwa iChiefs, ibisenalo igunya lokumgcina kuze kusongwe imidlalo yesizini ngenxa yokuthi iFifa eyengamele ibhola emhlabeni, iyalele wonke amaqembu ukuthi azelule izinkontileka zabadlali ebeziphela ngoJuni, kuhanjiswane nokuthi kusongwe amasizini aphazanyiswe wukubheduka kweCovid-19.
Inkontileka kaMaluleka kwiChiefs iphele ngoJuni 30 kodwa esikhundleni sokumgcina awasize aqedele isizini, Amakhosi aqoke ukumkhomba kwanhliziyongise nobekusho ukuyoqala umendo kwiSundowns.
UMatthew Booth, obalwa kubahlaziyi abakhaliphile bethelevishini eNingizimu Afrika, noMark Haskins osehlaziya kwiRadio2000 ngemuva kokudlala emaqenjini okubalwa kuwo iJomo Cosmos, Moroka Swallow, Bidvest Wits neSuperSport United- yibo abasola iChiefs ngokuzenzela phansi ngoMaluleka.
“Uma kungadlaleki kuLebo Manyama, iChiefs ayidlali nhlobo. UKatsande (Willard) no-Agay (u-Akumu) ngamadoda aqinile, angakwazi ukunyakaza kalula. Ngaleyo ndlela kuncane abakunika khona uma kuhlaselwa. Lokho kufanele ukuba kwenza iChiefs izisole ngokudedela uMaluleka ingakasongwa isizini. Siyabonakala isikhala sakhe,” kusho uBooth.
Akukwazi ukuthi uMaluleka nguye obesejahe ukuya kwiSundowns kwazise uyifenisha kule sizini ngenxa yokuthi akakwazi ukuyidlalela ngoba eyijoyine lingavuliwe iwindi lokudayiselana ngabadlali kanti ubephuma kwenye inkontileka.
Lokho kusho ukuthi uma iSundowns iphetha ngokunqoba iligi, ngeke ayithole indondo.
Indlela abahlukane ngayo neChiefs iveza ukuthi uma isinqoba isicoco nayo ngeke imnike isicoco namabhonasi kwazise kuzodliwa kahle njengoba abaxhasi i-Absa bevalelisa ngo-R15 million, eqenjini elizothatha isicoco seligi.
UHaskins naye uhambe emagameni kaBooth ngokuthi:
“Asazi ukuthi kwenzekeni ngaphakathi eqenjini okuholele ekutheni bahlukane noMaluleka ngalesi sikhathi esibucayi kangaka. Nginesiqiniseko bahleke bodwa kwiSundowns ngoba bebazi ukuwela kwakhe manje kuzoyishiya iChiefs izacile. Iqiniso wukuthi indlela abadlale ngayo esiswini, bakhombise ukumdinga umuntu obezovusa umhlwenga anyuse amagiya. Sibekhona, saba sikhulu isikhala sikaMaluleka.”