ISIKHULU esiphezulu kuMaZulu FC, uLunga Sokhela, sithi kungenzeka kuphele unyaka inhlangano eyengamele unobhutshuzwayo emhlabeni iFifa, ibe isinqumile ngodaba lwaleli qembu eluyinzukayikeyi lokuphucwa amaphuzu ayisithupha.
Usuthu luphucwe amaphuzu emuva kokutholakala lunecala ngokunqamula inkontileka yomdlali waseNamibia, uPhineas Nambandi, ngokungemthetho.
Leli qembu elizinze eThekwini liphucwe amaphuzu ngoSepthemba nonyaka. IFifa iyalele Usuthu ukuba lukhokhe imali ewu-R1.5 million eyizindleko zalo mdlali.
Ngokusho kukaSokhela, iFifa igagamelile ngokubajezisa ngale ndlela kwazise uNambandi ubengekho emabhukwini abaphathi abasha boSuthu njengoba lwashintsha abaphathi ngesikhathi luthenga isitifiketi sePremiership kwiThanda Royal Zulu, eminyakeni emibili edlule.
Njengamanje AmaZulu adonsa kanzima kwi-log, ayibambe emsileni ngamaphuzu amane, emidlalweni eyishumi. USokhela uthe abahlalanga nje dekle ngalolu daba, kukhona asebekwenzile.
“Bekufanele sibhale incwadi ngalolu daba esikholelwa ekutheni iFifa ayizange ikhanyiseleke ngalo ngaphambi kokuthatha isinqumo eyasithatha. Leyo ncwadi bekufanele ibe isikwiFifa ngo-Okthoba 22. IFifa iyibuyisile impendulo ngoNovemba 2, yabhalela inhlangano eyengamele ibhola kuleli iSouth African Football Association (Safa). Kule ncwadi bacele iSafa ukuthi kube khona izinto ezimbalwa ezicacisayo ngathi. Njengamanje iSafa isibaphendulile, sesilindele impendulo kwiFifa. Sinethemba lokuthi uzophela unyaka esikuwona sekucacile ngalolu daba,” kulandisa uSokhela.
Lesi sikhulu sithe ngeke saphumela obala ngokuthi ngabe la maphuzu ayisithupha azobuya yini, njengoba konke manje sekusezandleni zeFifa.
Eqhubeka echaza uSokhela uthe abadlali bayasamukela isimo iqembu elingaphansi kwaso.
“Siyazi ukuthi silapha ezansi ngenxa yokuthi kunezimo ezithile abadlali abebengeke bakwazi ukumelana nazo. Bayazi futhi abadlali ukuthi akungoba bengadlali kahle. Okuhle ngalesi simo ukuthi senzeke kusenesikhathi futhi nabadlali bakhombise ukusamukela ngokukhula ngesikhathi sibatshela ngaso.
Mina nje siqu sami angikhathazekile ngokuthi iqembu lizohluleka ukuphuma kulesi simo. Ngiyazi ukuthi sinabadlali abasezingeni eliphezulu abazolisiza iqembu. Ngiyazi ukuthi sizobuya ngamandla,” usho kanje uSokhela