XOLILE MPISANE
Cameroon (2) 2
Burkina Faso (1) 1
LIWUQALE ngonyawo oluhle umqhudelwano we-Africa Cup of Nations (Afcon) iqembu lasekhaya iCameroon ngokuguqisa iBurkina Faso ngo 2-1 emdlalweni wokuqala ka-Group A.
I-Indomitable Lions ibuye isilandela ngemuva kulo mdlalo obuseStade Omnisport Paul Biya ngamagoli amabili ka-Vincent Aboubakar acishe ebelishwaye nguGustavo Sangare.
Iqembu lasekhaya yilona ebeliphethe ibhola ngasekuqaleni kwesiwombe sokuqala kodwa lingawakhi amathuba ayingozi.
U-Aboubakar uzakhele isikhala ngaphandle kancane kwebhokisi ngomzuzu wesikhombisa kodwa wavele wadiliza izidleke zezinyoni phezulu esihlahleni.
AmaStallions afake ingcindezi ngekhona ayithole ngomzuzu ka-23, ibhola ebelingqofwe nguBertrand Traore lavinjwa kulayini.
Igoli liqhamuke kuwona lowo mnyakazo ngebhola eligotshwe nguTraore kwesokudla, lavalelwa nguSangare engamakiwe ebhokisini.
Leli goli liyivuse emaqandeni i-Indomitable Lions yaqala ukuhlasela ngesivinini. Igoli lokulinganisa kube yiphenathi ebekwe enethini ngu-Aboubakar ngomzuzu ka-40.
Ukaputeni we-Burkina Faso, uTraore, uzenzele phansi ezakhe ngokuwisa u-Andre-Frank Anguissa ebhokisini. Unompempe ubengabonanga kahle kodwa wagcina elikhombe emlotheni ngemuva kokubhekisisa kwiVAR (Video Assistant Referee).
Igoli lesibili leCameroon lingene ngendlela efanayo sekusele imizuzwana kuyiwe ekhefini. Kulokhu wu-Issoufou Dayo othele phansi u-Nouhou Tolo ebhokisini kungenasidingo.
UAboubakar ukhombise ukuzethemba waphinde wayinamathelisa enethini iphenathi yakhe, esemlahla okwesibili unozinti weBurkina Faso uHerve Koffi.
Izivakashi zibuye nomfutho ngesiwombe sesibili zizama ukuthola igoli lokulinganisa, wala ukhasha unozinti weCameroon, u-Andre Onana.
Uvimbe amabhola amabili ayingozi, ebelithunyelwe ngu-Cyrille Bayala eseduze ngomzuzu ka-55, nentambo ende ebidonswe ngu-Traore ngoka-68.
Lawa mathuba aphinde aliphaphamisa iqembu lasekhaya. U-Anguissa obeyisikweletu ezitobheni zeBurkina Fado kusale kancane ashaye igoli ebelizonika ezakhe igebe lokuphefumula, ibhola lakhe laphuma eceleni kwepali.
Lo mphumela ubeke iCameroon esicongweni kuGroup A kanti iBurkina Faso isiphoqelekile ukuthi ibuye ngamandla emidlalweni emibili esele ukuze izibeke ethubeni lokudlulela esigabeni esilandelayo.
Umdlalo wesibili kuleli qoqo uzoba phakathi kwe-Ethiopia neCape Verde.