UYIHLABE wayihlikiza indlela elidlale ngayo iqembu umqeqeshi weKaizer Chiefs u-Ernst Middendorp ngenkathi ezakhe zishaywa yiPolokwane City ngo 1-0 eFNB Stadium ngoMgqibelo ntambama.
IChiefs ibihlulwa okokuqala kule sizini kwazise isaqhwakele esicongweni se-ABSA Premiership ngokulingana nePolokwane City. Igoli lePolokwane kube yiphenathi evalelwe enethini nguJabu Maluleke ngomzuzu ka-16 emva kokuthi unozinti weChiefs uDaniel Akpeyi edlalise kabi umgadli uCharlton Mashumba.
UMiddendorp ukhombise ukukhathazeka ngendlela ezakhe ezidlale ngayo. “Asidlalanga ngendlela egculisayo, besidlala amabhola amade ezikhathini eziningi. Bebevale kahle emuva abePolokwane City, besidlala ibhola emoyeni kodwa siwatholile namathuba okushaya amagoli ngesiwombe sesibili. Sizamile kodwa abahlangene kahle abadlali. Asikwazanga ukugcina umgqigqo wethu kwezinye izikhathi emdlalweni,” kuchaza uMiddendorp ecashunwa abeSupersport.
UMiddendorp ushiye ngaphandle isethenjwa somgadli uKhama Billiat njengoba kade esanda kubuya eqenjini lesizwe iZimbabwe elizibekisele indawo emidlalweni yokuhlungela iNdebe yoMhlaba ezoba seQatar ngo-2022. UMiddendorp uke wazwakalisa ukungenami ngendlela uBilliat ahambe ngayo ukuyodlalela iZimbabwe njengoba kade engakalulami ngokugcwele.
Unozinti u-Itumeleng Khune uphinde wahlaliswa ebhentshini njengoba esanda kululama ngokugcwele.
“Sibanikeze ithuba lokushaya igoli ngephenathi, okube yinto ebhedayo. Siyayazi iPolokwane, ipaka ibhasi, ingayi phambili. Bekumele sidlale ngokushesha, siphaselane kahle. Bekungamele sishaye amabhola phambili ngoba bekungasebenzi. Besinamaphutha futhi besitatazela kakhulu, kuchaza uMiddendorp.
IChiefs izothola ithuba lokubuyisa izinduku uma isibhekene naMazulu emdlalweni weligi ngoSepthemba 24 eKing Zwelithini Stadium.