ZAKHELE XABA
I-ORLANDO Pirates izibeke obala izinhloso zokuwina iligi yeDStv Diski Challenge, ngokwehlula iMamelodi Sundowns emdlalweni wokuqala wonyaka.
IPirates, evale unyaka u-2021 ihlezi esicongweni selog, izolo yehlule iSundowns ngo 3-2 eLucas Moripe Stadium, ePitoli.
Ngokuwina, iPirates ibuyelwe igebe lamaphuzu amathathu phakathi kwayo neStellenbosch esendaweni yesibili. Isiwine imidlalo eyisikhombisa ilandelana.
EZimnyama izolo zidlale sezilingana ngamaphuzu neStellies okuthe ngoMgqibelo yanqoba iTS Galaxy. Kugqame umgadli uBoitumelo "Radioman" Radiopane, oshaye amagoli amabili. URadiopane usehamba phambili ngamagoli kwiDiski Challenge, njengoba eseqobele phakathi ayisishiyagalolunye.
Ngasemsileni welog ayilethanga izinguquko imidlalo yokuqala yonyaka. ILamontville Golden Arrows esendaweni ka-14, yehlulwe ekugcineni yiBaroka elande umgadli weBafana Bafana, u-Evidence Makgopa. ISekhukhune United neSwallows babhuquzisane ngo 2-2 eDr Molemela Stadium, eBloemfontein, baqhubeka nokuhlala endaweni ka-15 no-16 ngokulandelana.
Umqeqeshi we-Arrows, uSibongiseni Cele, ukhale ngobunzima bomdlalo.
"Bekungomunye wemidlalo enzima kakhulu, omunye wenziwa ngokudlulele. Esiwombeni sokuqala sizamile ukuba bamba ngokubalinda beze kithina ngoba besazi ukuthi bahle ekugobeni amabhola. Esiwombeni sesibili sinqume ukuya kubona, sibone ukuthi bazokwazi yini ukusimela,"kusho uCele.
"Nakuba singenelwe yigoli ngomzuzu wokugcina womdlalo, ngijabule ngendlela abafana bami ababili abayibamba ngayo maphakathi emuva. Baphumelele ukumaka uMakgopa namabhola abegotshwa ezinhlangothini. Ngiyathemba ukuthi ngesonto elizayo abagadli bethu bazobuya, sizoba bukhali phambili."
Imiphumela yemidlalo yeDStv Diski Challenge
AmaZulu 1-1 Maritzburg United
Royal AM 5-4 Kaizer Chiefs
Marumo Gallants 2-5 Chippa United
Stellenbosch 2-0 TS Galaxy
SuperSport United 1-1 Cape Town City
Baroka 1-0 Golden Arrows
Sekhukhune United 2-2 Swallows
Mamelodi Sundowns Orlando Pirates