AYIQALE ngonyawo oluhle amaqembu aKwaZulu-Natal isizini ka-2021/2022 yeDStv Diski Challenge Rewired enqoba imidlalo yawo yokuvula. IMaritzburg United iguqise iSekhukhune United ngo 2-1 eHarry Gwala Stadium, eMgungundlovu, kwathi iRoyal AM ebidlala ekuhambeni yashaya iChippa United ngo 3-2 eWolfson Stadium, eGqeberha, namuhla.
Ukunqoba kweMaritzburg neRoyal AM akungatshazwa ukuthi sekufake ingcindezi engayiwa kuMaZulu FC neLamontville Golden Arrows abazodudulana emdlalweni womkhaya, ozodlalwa eKing Zwelithini Stadium, eMlaza, kusasa ngo-12 emini.
AmaZulu acijwa nguSiboniso “Nini” Vilakazi yiwona avikela isicoco asinqobe ngesizini edlule eguqisa iMamaledi Sundowns ngo 2-0 kowamanqamu.
Engxoxweni abenayo neSolezwe ngeSonto, uVilakazi ukubeke kwacaca ukuthi bayiqonda kahle ingcindezi ababhekene nayo kule sizini njengoba kuyibona abavikela isicoco, kodwa yize bezimisele ngokubuya nawo ephelele amaphuzu emdlalweni womkhaya bayazi ukuthi balindele umdlalo onzima komkhaya babo, Abafana Bes’thende.
Omunye umdlalo obhekwe ngabomvu ngophakathi kweKaizer Chiefs ne-Orlando Pirates, eBidvest Wits Stadium, eGoli, kusasa ngo-12.30 emini.
Imiphumela yanamuhla yeDStv Diski Challenge Rewired:
Chippa United 2-3 Royal AM; Swallows FC 2-2 TS Galaxy; Maritzburg United 2-1 Sekhukhune United, SuperSport United 2-1 Mamelodi Sundowns.