IROYAL Eagles neTshakhuma Tsha Madzivhandila bangase balahlekelwe yizibabuli zabadlali uma bephetha ngokuhluleka wukukhuphukela kwi-Absa Premeirship.
La maqembu yiwo avule imidlalo yokuhlungela iPremiership eChatsworth Stadium, eThekwini ngoLwesithathu ntambama.
Kulo mdlalo ezithengane kuwo kwaze kwayovalwa, kugcine kunqobe i-Eagles ngo 1-0 wegoli likaStrydom Wambi alishaye ngesiwombe sokuqala.
Namuhla i-Eagles ihlasela iMaritzburg United eHarry Gwala Stadium, eMgungundlovu emdlalweni ongo-3 ntambama.
Okugqamile emdlalweni wangoLwesithathu wukuthi womabili la maqembu kuzomele akhuphule amasokisi ukuketula iMaritzburg eqede ikunombolo-15 kwiPremiership.
Okubeka la maqembu engozini yokulahlekelwa ngabadlali bawo abaphambili wukuthi baphelelwa yizinkontileka ekupheleni kukaJuni.
Kwi-Eagles yisikhwishikhwishi esinguLevy Mashiane esiphelelwa yinkontileka kanti kwiTshakhuma yizinjini uLucky Khumalo noNhlanhla Mgaga.
UMashiane wase-Atteridgeville, eTshwane ufike kwi-Eagles ngesizini edlule wasayina inkontileka yonyaka owodwa enombandela wokuvuselala ngomunye.
Ngo-2018/2019 ubedlala ngawo lo mbandela. “Khona inkontileka yami iyaphela njengoba bengidlala ngombandela wokuvuselela kulo nyaka. Nokho okwamanje anginazo izesheli, ngizimisele ngomsebenzi engiwenza eqenjini (kwi-Eagles) okwamanje. Kuzobonaka. Okwamanje ngisagxile emsebenzini we-Eagles."
UMgaga waseMeadowlands, eSoweto oshikisha kucace enkabeni yenkundla akakufihlanga ukuthi akhona amaqembu amshelayo kodwa naye wagcizelela ukuthi uzoze awalele kahle uma eseqede umsebenzi neTshakhuma.
“Akhona impela amaqembu angifunayo nasekuvezile lokho kodwa ngicellile ukuthi ame kancane ngoba ngisahlalelwe wumsebenzi omkhulu la (uukusiza iTshakhuma kuma-playoffs). Bengisayine inkontileka yonyaka owodwa kwiTshakhuma, nayo iyaphela ngoJuni.
“Uma siwela neTshakhuma ngizoqhubeka ngihlale ngoba vele into esiyifunayo namajita wukuya kwiPSL (Premiership). Nokho-ke uma kubheka sengingaqala ngilalele ezinye izicelo,”kusho lo mdlali ogqoka unombolo-10.
UMgaga, ofike kwiTshakhuma esuka kwiBaberwa, utholana kahle enkundleni noKhumalo waseNquthu.
“Asinaso isikhathi esiningi sidlala ndawonye. Wukuthi nje siyatholana,”kusho uMgaga, oveze ukuthi akhona amabhonasi abathenjiswe wona uma benqoba eyokuhlunga.
UMashiane okhuliswe kwiSuperSport United ngaphambi kokudlula kwiJDR Stars uthe yize engekho amabhonasi abathenjiswe wona kodwa bazoyinquma iMaritzburg.
“”Awekho amabhonasi esiwathenjisiwe, Into nje wukuthi bonke abadlali bayakufuna (ukukhuphulela iqembu kwiPremiership). Emdlalweni weMaritzburg kufanale siqaqeke ngoba badlala ezingeni eliphezulu. Kumele simelane nabo ngokuba sibe yimiqemane. Anginalo uvalo ngeMaritzburg. EMpeleni sizobashaya,” kusho uMashiane.