AbeChiefs bashaya amakhala ngoTau ‘ozidayisayo’
ISILOMO somdlali weBafana Bafana, uPercy Tau, osekusuke enkulu inkulumo mpikiswano kusukela ekhulume sakuzidayisa kwiKaizer Chiefs, Mamelodi Sundowns ne-Orlando Pirates
Image: BACKPAGEPIX
INGXENYE yabalandeli beKaizer Chiefs ikhombise izimpawu zokumchitha ngisho "esezilethile" kuleli qembu uPercy Tau, osematheni kulandela ukuqagela kwakhe esidlangalaleni iholo elingamenza aqalaze uma bemqhweba eNaturena.
Lokhu kulandele ukuthi uTau ongenalo iqembu kusukela ehlukanise neQatar SC yaseQatar, ekhulume sakuzidayisa emaqenjini okubalwa kuwona iChiefs.
UTau (31) owagqama kwiSundowns ngaphambi kokudlulela eBelgium, England, Egypt naseQatar, ukusho lokhu kwiMarawa Sports Worldwide (MSW).
Abalandeli beChiefs bathe bangezwa ukuthi uTau angawamukela u-R450 000 ngenyanga kwinkontileka yamasizini amabili, bangena ezinkundleni zokuxhumana beyozwakalisa ilaka labo.
Kusemqoka ukuqaphela ukuthi bekwenziwa umzekeliso ngalo R450 000, hhayi ngoba kuwukuthi uTau ufuna lesi samba ngempela.
“Akakhohlwe, ngeke iChiefs imkhokhele le mali ayifunayo ngoba useneminyaka engu-31,” ubhale kanje u-@jameslapota ekhasini lakhe lika-X.
No-@thabanirich kwelakhe uthe: “Mhlawumbe iSundowns izomnika le mali ayifunayo, ngeke ayithole kwiChiefs futhi sekuphelile ngaye.”
Ngaphandle kwabebegxeka uTau ngokuthi ufuna imali yomhlalaphansi, ukhona vele umuzwa wokuthi abadlali ababuya phesheya kwezilwandle bajwayele ukufika babe wusizo kwiChiefs.
Abadlali esingabala kubona uTsepo Masilela, Bernard Parker, Siboniso Gaxa noKeagan Dolly, ukubala abambalwa bonke babuya phesheya kwezilwandle bafaka isandla kwiChiefs.
Nakuba uTau eke waba nyamanambana kubalandeli ngisho nakwiBafana Bafana ngenxa yefomu kodwa kungenzeka ukuthi kuningi asengakwenzela iChiefs.
Uwuhlobo lomdlali okwaziyo ukuwina futhi njengoba ezisholo ngokwakhe ukuthi wakhula ewumlandeli waMakhosi, mhlawumbe kukhulu angawenzela khona.
Kulolu hlelo abekhuluma kulona uTau, akazange akufihle ukuthi ufuna umsebenzi kwazise unomndeni okufanele awondle.
“Angilona uhlobo lomdlali obeka imali phambili uma kunezingxoxo ngenkontileka,” kusho uTau.
“Angikho esimweni sokuzikhethela kodwa iqembu elizokhuluma nami ngizolalela ngoba ngidinga umsebenzi. Yebo kuningi okufanele kuqondane phakathi kwempilo yami neqembu engizogcina kulona njengoba sengineminyaka engu-31 njengobude benkontileka esivumelana ngayo.
“Ngizimisele ukulalela uma iChiefs ikhombisa intshisekelo ngoba yiqembu engikhule ngililandela. Kusemqoka nokukhumbula kodwa ukuthi ngila ngikhona nje kungenxa yeSundowns okuyiqembu eliyohlale lisenhliziyweni kimina.
“Maningi amaqembu yingakho ngivule izandla kunoma yiliphi elifuna ukukhuluma nalaba abaphethe izindaba zami okuhlanganisa ne-Orlando Pirates, Stellenbosch FC ngisho iSuperSport United."