Isiyoqhubeka e-Algeria eyokuklwebhana kukaRulani noRamovic
KUBUKEKA sengathi izoqala phansi impi yamazwi phakathi kukaSead Ramovic noRulani Mokwena asebezobanga isicoco seligi enkulu yase-Algeria
Image: BACKPAGEPIX
UKUQASHWA njengenhloko yabaqeqeshi kwakamuva kukaRulani Mokwena kwiMC Alger yase-Algeria, kungase kuvule inkundla yokuthi kuqhubeke ukungcofana obekwenzeka phakathi kwakhe noSead Ramovic ngesikhathi bobabili laba baqeqeshi besasebenza kwiPremier Soccer League (PSL).
UMokwena ogcine ukubonakala esebhentshni leWydad Athletic yaseMorocco, ngaphambi kokuhlukanisa nayo isigubhukane ngaphambi kokusongwa kwesizini edlule, uqashwe ngompetha base-Algeria emuva kwamasonto ekade emataniswa ne-Orlando Pirates.
Ukuba yinkukhu nempaka kukaMokwena noRamovic, owayeqeqesha i-TS Galaxy, yikhona okugqame kuqala ngesikhathi kuvele izindaba zokuthi uMokwena usezosebenza e-Algeria.
Ngesikhathi uMokwena ethulwa yiWydad ngoJulayi wonyaka odlule, uRamovic wambongela sakumgudla embiza ngo-Mr Sunshine esithangamini nabezindaba.
Akazange aliyeke ithuba uMokwena, waphendula ngeyakhe indlela echaza uRamovic njengohlobo lomuntu okuthandayo ukubukwa.
Kule ligi uMokwena aya kuyona, uyobanga izicoco nomqeqeshi okungadingi ukutolikwa ukuthi kabafunani.
Ubufakazi balokhu busekutheni ngisho sebeqeqesha kumalingi angafani, bebengaliyeki ithuba lokuphendula ngomunye uma bebuzwa.
URamovic uyinhloko kwiCR Belouizdad ebiseqoweni elifanayo nePirates kwiChampions League ngesizini edlule. Leli qembu elingelinye lamakhulu e-Algeria, lidlalelwa ngumgadli uKhanyisa Mayo wodumo kwiCape Town City.
Ingxabano yalaba baqeqeshi yasuswa wukuthi iGalaxy kaRamovic yakhipha iSundowns kwiCarling Knockout okwalandelwa wukuthi uMokwena akhale ngabadlali bakhe abebengekho.
Iningi labadlali beSundowns lalisekhempini yeBafana Bafana kodwa uRamovic akayithandanga indlela uMokwena enza ngayo kwazise lo mqeqeshi waseSerbia wayekholelwa ekutheni ucasha ngesithupha esikhundleni sokuncoma iqembu elimwashise ijezi.
“Ngokwazi kwami unobhutshuzwayo udlalwa ngaphansi kwesivumelwano senhlonipho ngakho-ke uMr Sunshine angimubali lapho ngoba wazi inhlamba nokuba wunontanda kubukwa,” kusho uRamovic muva nje ekhuluma ese-Algeria, ngaphandle kokubiza igama likaMokwena.
“Akahloniphi futhi akumfanele nokuthi kukhulunywe ngaye. Yonke into uyithatha ngehaba kanti wake wangifonela wangithuka ngenhlamba okunzima ukuyisho engisabisa nangokuthi bazoqeda ngami abangani bakhe abasemkhakheni wezindaba.”
NgoFebhuwari nyakenye uRamovic wathi: “Asikho kangako isidingo sokumnaka uMr Sunshine ngoba ngasemaqhingeni akukho lutho ngaphandle kokusiqambela amanga ngokuthi abadlali beSundowns namakhosikazi abo babekhala izinyembezi ngoba ebashiya eya kwiWydad.”
Ikhempu kaMokwena izama ngakho konke okusemandleni ukuziba uRamovic uma ibuzwa ngaye kodwa okusobala wukuthi nakanjani lokhu kuklwebhana kuzoqala phansi kwiligi yase-Algeria.